(ព្រះសីហនុ) ៖ ក្រុមក្មេងទំនើងចំនួន ០៤ក្រុម ដែលបង្កអសន្តិសុខនៅក្នុងស្រុកស្ទឹងហាវ ខេត្តព្រះសីហនុ នៅថ្ងៃទី២៣ ខែកញ្ញា ឆ្នាំ២០២៣ លោក ម៉ាង ស៊ីណេត អភិបាលរងខេត្តព្រះសីហនុ អញ្ជើញធ្វើការអប់រំយក្រុមក្មេងទំនើងស្រីប្រុសទាំង ១៦នាក់ ដោយមានការចូលរួមពីលោកអភិបាលរងស្រុក លោកអនុប្រធានមន្ទីរអប់រំខេត្ត អាជ្ញាធរ និងអណាព្យាបាលនៅអធិការដ្ឋាននគរបាលស្រុកស្ទឹងហាវ ។
ក្រុមក្មេងទំនើងមានគ្នាចំនួន ១៦នាក់ ស្រី ០១នាក់ ជិះម៉ូតូចំនួន ០៧គ្រឿង បានជិះចូលសាលាវិទ្យាល័យស្ទឹងហាវ ស្រុកស្ទឹងហាវ កាលពីថ្ងៃទី២១ ខែកញ្ញា ឆ្នាំ២០២៣ បានធ្វើសកម្មភាពវាយសិស្សសាលាដែលកំពុងអង្គុយលើម៉ូតូមិនដឹងខ្លួន បណ្តាលឱ្យសិស្ស ០២នាក់រងរបួស និង ០៣នាក់ទៀតរត់រួចខ្លួន ។
លោក ម៉ាង ស៊ីណេត អភិបាលរងខេត្តព្រះសីហនុ បានធ្វើការណែនាំដល់ក្រុមក្មេងទំនើងមានដូចជាក្រុម GF, PL, BT, FMF បានប្រព្រឹត្តអំពើដែលសង្គមជាតិស្អប់ខ្ពើម ក្មួយៗបានធ្វើសកម្មភាពខុសឆ្គងបង្កភាពអាម៉ាស់ដល់សង្គមជាតិ ក៏ដូចជាឪពុកម្តាយ និងក្រុមគ្រួសារ ស្របពេលដែលប្រទេសជាតិ និងខេត្តព្រះសីហនុកំពុងត្រូវបានអភិវឌ្ឍរីកចម្រើនលើគ្រប់វិស័យ ដែលអណាព្យាបាល ក៏ដួចជាលោកគ្រូ អ្នកគ្រូបានខិតខំធ្វើការអប់រំ បណ្តុះបណ្តាលក្មួយឱ្យក្លាយខ្លួនជាទំពាំងស្នងឫស្សី ជាកូនល្អ សិស្សល្អ មិត្តល្អ ពលរដ្ឋល្អក្នុងសង្គម ប៉ុន្តែពួកក្មួយនាំគ្នាបង្កើតជាក្រុមបង្កអសន្តិសុខដល់សង្គមជាតិទៅវិញ ដែលផ្ទុយទៅនឹងអ្វីដែលឪពុកម្តាយ និងប្រទេសជាតិត្រូវការនាពេលបច្ចុប្បន្ន ការបង្កើតក្រុមទាំងនេះប្រាសចាកសីលធម៌សង្គម ហើយការគិតខុសមួយពេលនាំឱ្យយើងខាតបង់កិត្តិយសខ្លួនឯង ក៏ដូចក្រុមគ្រួសារផងដែរ ។
លោកអភិបាលរងខេត្ត បានបញ្ជាក់ថា ឪពុកម្តាយឱ្យក្មួយចូលសាលាដើម្បីទទួលបាននូវចំណេះដឹង ចំណេះធ្វើ បំណិនជីវិត ដើម្បីចូលរួមចំណែកក្នុងការបង្កើនជីវភាពគ្រួសារ ត្រូវចេះកែប្រែខ្លួនពីទំពាំងស្អុយ មកជាទំពាំងល្អ មានចំណេះដឹងជំនាញវិជ្ជាជីវពិតប្រាកដទៅថ្ងៃមុខ ព្រោះវ័យនេះក្មួយត្រូវខិតខំរៀនសូត្រក្រេបយកចំណេះវិជ្ជា ដើម្បីអនាគតខ្លួនឯងគ្រួសារ និងសង្គមជាតិ ។
ក្នុងឱកាសនោះ លោកអភិបាលរងខេត្តព្រះសីហនុ បានស្នើឱ្យអាណាព្យាបាល នាយកសាលាត្រូវភ្ជាប់ក្រុមក្មេងទាំងនេះធ្វើការតាមដាននៅពេលចេញពីផ្ទះទៅសាលា និងចេញពីសាលាមកផ្ទះ ប្រសិនបើមិនចូលសាលាត្រូវរាយការណ៍ ដើម្បីឱ្យសមត្តកិច្ចរបស់យើងចុះរកក្រុមក្មេងទាំងនេះយកមកអប់រំនៅប៉ុស្តិ៍នគរបាលដែលនៅជិត និងឱ្យអណាព្យបាលធ្វើកិច្ចសន្យាយកកូនរបស់ពួកគាត់ត្រឡប់ទៅផ្ទះវិញ ប្រសិននៅពេលក្រោយនៅតែបង្កអសន្តិសុខទៀត និងមិនមានការលើកលែងអនុគ្រោះ គឺត្រូវផ្តន្ទាទោសតាមផ្លូវច្បាប់ ៕
(ភ្នំពេញ) ៖ បុរសអ្នកលក់ចង្រឹតបំពងម្នាក់ មានអាការមិនស្រួលខ្លួន បណ្ដាលមកពីជំងឺសសៃសន្លាក់ជើង និងជង្គង់ ហើយបានទៅពិនិត្យពិគ្រោះ និងព្យាបាលនៅគ្លីនិក «ជា សុវណ្ណដា» ខណៈនោះគ្រូពេទ្យបានផ្សំថ្នាំឱ្យលេប ប៉ុន្តែនៅតែពុំបានធូរស្រាលសោះ ទើបប្រពន្ធទៅតាមគ្រូពេទ្យឱ្យទៅពិនិត្យជាលើកទី២ ដល់ផ្ទះអ្នកជំងឺតែម្ដង ពេលនោះគ្រូពេទ្យបានដាក់សេរ៉ូមឱ្យ ក៏នៅតែមិនធូរ ក្រោយគ្រូពេទ្យចាកចេញទៅបាត់ អ្នកជំងឺរឹតតែធ្ងន់ទៅៗ ទើបស្ត្រីជាប្រពន្ធ និងបងប្អូន បានដឹកប្ដីតាមរថយន្តផ្ទាល់ខ្លួន ទៅកាន់គ្លីនិកមួយផ្សេងទៀត ដើម្បីសង្គ្រោះ ។ នៅពេលទៅដល់ពេទ្យ គ្រូពេទ្យបានប្រាប់ថា បុរសនោះស្លាប់បាត់ទៅហើយ ទើបដឹកសពទៅកាន់វត្តជម្ពូវ័ន្ត និងប្ដឹងនគរបាលឱ្យឃាត់ខ្លួនគ្រូពេទ្យម្នាក់ ដែលជាអ្នកព្យាបាល ដើម្បីនាំទៅធ្វើការសាកសួរ ព្រោះសង្ស័យថាបុរសខាងលើស្លាប់ដោយសារប្រតិកម្មថ្នាំ និងសេរ៉ូម ។
ហេតុការណ៍នេះបានកើតឡើង កាលពីវេលាម៉ោង ០២ និង ២០នាទីរសៀល ថ្ងៃទី២២ ខែកញ្ញា ឆ្នាំ២០២៣ នៅភូមិអូរដឹម សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
សពបុរសខាងលើ មានឈ្មោះ វ៉ា ចាន់ណាក់ អាយុ ៣៧ឆ្នាំ មុខរបរលក់ចង្រឹតបំពង មានប្រពន្ធឈ្មោះ កែវ ផល អាយុ ៣៧ឆ្នាំ មុខរបរលក់ចង្រឹតបំពង មានទីលំនៅភូមិតាសិត ឃុំពពេល ស្រុកត្រាំកក់ ខេត្តតាកែវ សព្វថ្ងៃស្នាក់នៅផ្ទះជួល ស្ថិតនៅក្នុងភូមិអង្គ ។ ដោយឡែកគ្រូពេទ្យ ដែលត្រូវនគរបាលឃាត់ខ្លួនសួរនាំមានឈ្មោះ ជា សុវណ្ណដា ភេទប្រុស អាយុ ៣៥ឆ្នាំ មានទីលំនៅក្នុងភូមិកើតហេតុខាងលើនោះដែរ ។
ប្រពន្ធបានប្រាប់មន្ត្រីនគរបាលថា ប្តីរបស់គាត់ឈឺជើង និងជង្គង់ ហើយនៅវេលាព្រឹកថ្ងៃកើតហេតុ ក៏បានទៅពិនិត្យ និងពិគ្រោះនៅគ្លីនិក «ជា សុវណ្ណដា» ដែលស្ថិតនៅក្នុងភូមិជាមួយគ្នានោះដែរ ពេលនោះលោកគ្រូពេទ្យ បានផ្សំថ្នាំឱ្យលេប ប៉ុន្តែក្រោយត្រឡប់ដល់ផ្ទះលេបថ្នាំរួច នៅតែមិនធូរសោះ ទើបគាត់ទៅតាមហៅគ្រូពេទ្យឱ្យមកពិនិត្យដល់ផ្ទះម្ដងទៀត ។ ខណៈនោះ គ្រូពេទ្យបានដាក់សេរ៉ូម ០១ដបតូច រួចហើយបានចាកចេញទៅបាត់ ប៉ុន្តែមុនចាកចេញទៅបានទុកសេរ៉ូម ០១ប្លោកធំទៀត នៅនឹងគាត់ដោយគ្រូពេទ្យឈ្មោះ ជា សុវណ្ណដា នោះបានប្រាប់គាត់ថា «ពេលអស់ដបតូច ចាំដាក់អាធំ បន្តទៀតផង» ។
ស្ត្រីជាប្រពន្ធ បានប្រាប់ឱ្យដឹងបន្តទៀតថា លុះក្រោយអស់សេរ៉ូមដបតូច ប្ដីគាត់មានអាការខ្យោយទៅៗ មិនបានធូរស្បើយ ឬគ្មានកម្លាំងកំហែងបន្តិចសោះ ហើយគាត់ក៏បានដាក់សេរ៉ូមប្លោកធំបន្តទៀត ទៅតាមអ្វី ដែលគ្រូពេទ្យនោះណែនាំ ។ លុះក្រោយពេលដាក់សេរ៉ូមប្លោកទី២ បានបន្តិច ប្ដីគាត់មានអាការកាន់តែមិនស្រួលទៅៗថែមទៀត ទើបគាត់ប្រាប់បងប្អូនឱ្យបានដឹង ហើយក៏នាំគ្នាដឹកប្ដីតាមរថយន្តផ្ទាល់ខ្លួនយកទៅកាន់គ្លីនិក «មាតាអូរដឹម» ដើម្បីសង្គ្រោះ ប៉ុន្តែពេលទៅដល់គ្រូពេទ្យបានប្រាប់ថា ប្ដីគាត់ស្លាប់បាត់ទៅហើយ ទើបដឹកសពត្រឡប់ទៅកាន់វត្តជម្ពូវ័ន្តវិញ រួចប្តឹងនគរបាលឱ្យជួយអន្តរាគមន៍តែម្ដង ។
មន្ត្រីនគរបាលបាននិយាយថា ក្រោយទទួលបានបណ្ដឹងពីស្ត្រីជាប្រពន្ធរបស់បុរសខាងលើនោះហើយ កម្លាំងនគរបាលប៉ុស្តិ៍ចោមចៅទី៣ បានចុះទៅកាន់ទីតាំងគ្លីនិកគ្លីនិក «ជា សុវណ្ណដា» ហើយបានឃាត់ខ្លួនគ្រូពេទ្យ ជា សុវណ្ណដា នាំទៅសាកសួរ ព្រោះសង្ស័យថា ព្យាបាលបង្កឱ្យមនុស្សស្លាប់ ។ បន្ទាប់មកនគរបាលប៉ុស្តិ៍ ក៏បានរាយការណ៍បន្តទៅកាន់នគរបាលការិយាល័យបច្ចេកទេសវិទ្យាសាស្ត្រ នៃស្នងការដ្ឋាននគរបាលរាជធានីភ្នំពេញ ចុះធ្វើកោសល្យវិច័យដើម្បីស្វែងរកមូលហេតុពិតប្រាកដ ៕
ខេត្តតាកែវ៖ដោយមានការយកចិត្តទុក្ចពីសំណាក់លោកអធិការដ្ថាននគបាលស្រុកព្រៃកប្បាស់នៅ ថ្ងៃព្រហស្បតិ៍ ៧កេីត ខែភទ្របទ ឆ្នាំថោះ បញ្ចាស័ក ព.ស២៥៦៧ ត្រូវនឹងថ្ងៃទី២១ ខែកញ្ញា ឆ្នាំ២០២៣ ម៉ោង០១និង១០នាទី លោកវរសេនីយ៍ឯក ឡេង ប៊ុនឡុង អធិការនគរបាលស្រុកព្រៃកប្បាស បានដឹកនាំបញ្ជាកម្លាំងជំនាញអធិការរដ្ឋាន សហការជាមួយកម្លាំងប៉ុស្តិ៍នគរបាលរដ្ឋបាលចារ បានចុះបង្ក្រាបករណីរក្សាទុកនិងប្រេីប្រាស់ដោយខុសច្បាប់នូវសារធាតុញៀនមួយករណី នៅចំណុចមាត់ស្រះរកាឈូក ស្ថិតក្នុងភូមិអង្គស្វាយចេក ឃុំចារ ស្រុកព្រៃកប្បាស ខេត្តតាកែវ ឃាត់ខ្លួនបានមុខសញ្ញាចំនួន០៣នាក់៖
១-ឈ្មោះ ង៉ែត សុផានិត ភេទប្រុស អាយុ២៦ឆ្នាំ រស់នៅភូមិកំពង់ហ្លួង ឃុំអង្គរបូរី ស្រុកអង្គរបូរី ខេត្តតាកែវ
ម្សៅក្រាមពណ៌សថ្លាសង្ស័យជាសាធាតុញៀនចំនួន០២កញ្ចប់ ដែកកេះ០១ កែវសម្រាប់ជក់០១ ម៉ូតូ០១គ្រឿងម៉ាក Zoomer ពណ៌ក្រហម ពាក់ផ្លាកលេខ ព្រៃវែង1K-7781 កាំបិតតាំងតោ០១ ទូរសព្ទ័ចំនួន០៣គ្រឿង ១.ម៉ាកRedmi ព័ណ៌ខ្មៅ ២.ម៉ាកRedmeពណ៌ខៀវ ៣.ម៉ាកអិនចុចពិល ទុលល្វីស០១។
បន្ទាប់មកកម្លាំងយើងបាននាំខ្លួនជនសង្ស័យខាងលើរួមទាំងវត្ថុតាងមកកាន់អធិការដ្ឋាននគរបាលស្រុកព្រៃកប្បាស ដើម្បីសាកសួរនិងកសាងសំណុំរឿងតាមនីតិវិធី។
ក្នុងនាម អធិការ នៃអធិការដ្ឋាននគរបាលស្រុកព្រៃកប្បាស សូមអំពាវនាវដល់បងប្អូនប្រជាពលរដ្ឋ ចូលរួមសហការផ្តល់ព័ត៌មាន រាល់បទល្មើស ដែលកើតឡើង ដើម្បីសមត្ថកិច្ចមានចំណាត់ការទាន់ពេលវេលា សូមរាយការណ៍មកទូរស័ព្ទលេខ 097 7780068 សូមអរគុណ!
(ភ្នំពេញ) ៖ ជនសង្ស័យ ០២នាក់ ត្រូវបានសមត្ថកិច្ចនគរបាលប៉ុស្តិ៍ស្រាវជ្រាវតាមបក្ខពួក បន្ទាប់ពីលួចកាច់កម៉ូតូនៅផ្ទះសំណាក់មួយកន្លែង ហើយទៅដេកនៅផ្ទះសំណាក់មួយកន្លែងទៀត បង្កឱ្យមានការភ្ញាក់ផ្អើលកាលពីវេលាម៉ោង ១២៖១០នាទីរំលងអាធ្រាត្រ ឈានចូលថ្ងៃទី១៧ ខែកញ្ញា ឆ្នាំ២០២៣ នៅផ្ទះសំណាក់ភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។
ម៉ូតូជនសង្ស័យលួចម៉ាកឌ្រីមសង់ ពណ៌ខ្មៅ ស៊េរីឆ្នាំ២០២៣ ពាក់ផ្លាកលេខ កំពង់ធំ 1S-9945 ។
ជនសង្ស័យទី១-ឈ្មោះ សៀង រ៉ា ភេទប្រុស អាយុ ១៧ឆ្នាំ មុខរបរកម្មកររោងចក្រ ស្នាក់នៅផ្ទះជួលក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ មានស្រុកកំណើតនៅភូមិអង្គរទ្រេត ឃុំអង្គរទ្រេត ស្រុកស្វាយអន្ទរ ខេត្តព្រៃវែង ។ ទី២-ឈ្មោះ ធូ ទិត្យ ភេទប្រុស អាយុ ១៨ឆ្នាំ មុខរបរកម្មកររោងចក្រ ស្នាក់នៅផ្ទះជួលភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ មានស្រុកកំណើត ភូមិអំពិល ឃុំអំពិល ស្រុកកំពង់សៀម ខេត្តកំពង់ចាម ។
តាមប្រភពព័ត៌មានពីកម្លាំងសមត្ថកិច្ចនគរបាលប៉ុស្តិ៍ បាននិយាយប្រាប់ថា នៅមុនពេលកើតហេតុ ជនរងគ្រោះ ០២នាក់ស្រីប្រុសបាននាំគ្នា ទៅដេកផ្ទះសំណាក់នៅភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ លុះនៅវេលាម៉ោងកើតហេតុ ដោយមានជនសង្ស័យ ០៤នាក់ ក្នុងនោះមាន ០២នាក់ស្រីប្រុស បានចូលផ្ទះសំណាក់ខាងលើដែរ ។ បន្ទាប់មក ជនសង្ស័យ ០២នាក់ស្រីប្រុស បាននាំគ្នាចេញទៅក្រៅបាត់ នៅជនសង្ស័យ ០២នាក់ដែលជាអ្នកធ្វើសកម្មភាព ដោយបានធ្វើសកម្មភាពលួចកាច់កម៉ូតូ ដោយមានសន្តិសុខយាមបានស្រែកថា ចោរៗ ហើយជនសង្ស័យទាំង ០២នាក់ ជិះគេចខ្លួនបាត់ ។
តាមប្រភពព័ត៌មានពីកម្លាំងសមត្ថកិច្ចនគរបាលប៉ុស្តិ៍ បានបន្តទៀតថា ខណៈជនសង្ស័យ ០២នាក់ លួចកាច់កម៉ូតូចេញពីផ្ទះសំណាក់ទៅបាត់ ហើយជនរងគ្រោះបានប្តឹងសមត្ថកិច្ចនគរបាលប៉ុស្តិ៍ភ្លាមៗ ។ បន្ទាប់មកបក្ខពួកជនសង្ស័យ ០២នាក់ ដែលដឹកគ្នាចេញទៅមុន ក្នុងនោះម្នាក់ដោយមិនដឹងរឿងបានជិះម៉ូតូមកដឹកជនសង្ស័យ ហើយត្រូវបានសមត្ថកិច្ចឃាត់សួរនាំភ្លាមៗ ។
បន្ទាប់មក កម្លាំងសមត្ថកិច្ចនគរបាលប៉ុស្តិ៍ បានឱ្យបុរសម្នាក់ជាបក្ខពួកជនសង្ស័យ បានឱ្យទាក់ទងទៅជនសង្ស័យ ដែលលួចម៉ូតូទាំង ០២នាក់ខាងលើ ហើយបានដឹងថា កំពុងដេកនៅផ្ទះសំណាក់ម្តុំ៣ដុល្លារយីហោ សុភមង្គល នៅសង្កាត់ចោមចៅទី១ ជិតផ្សារត្រពាំងថ្លឹង លុះព្រឹកឡើង សមត្ថកិច្ចចុះឃាត់បាន ០២នាក់ភ្លាមៗ ហើយយកមកសួរនាំនៅប៉ុស្តិ៍នគរបាលសង្កាត់កាកាបទី២ផងដែរ ។
ក្រោយពីការសាកសួរ និងស្តាប់ចម្លើយជនសង្ស័យខាងលើបានសារភាពថា ខ្លួនពិតជាបានលួចម៉ូតូជនរងគ្រោះប្រាកដមែន ហើយសមត្ថកិច្ចបានកសាងសំណុំរឿងបញ្ជូនជនសង្ស័យទាំង ០២នាក់ ទៅផ្នែកជំនាញព្រហ្មទណ្ឌខណ្ឌពោធិ៍សែនជ័យ ដើម្បីចាត់ការតាមនីតិវិធី ៕
(ប្រទេសប្រស៊ីល) ៖ ទីភ្នាក់ងារព័ត៌មាន AFP រាយការណ៍នាថ្ងៃទី១៧ ខែកញ្ញា ឆ្នាំ២០២៣ថា យោងតាមអាជ្ញាធរថាមនុស្ស ១៤នាក់ បានត្រូវស្លាប់កាលពីថ្ងៃទី១៦ ខែកញ្ញា ដោយសារការធ្លាក់យន្តហោះ ០១គ្រឿង នៅក្រុងបាសឺឡូសជាទីក្រុងទេសចរណ៍មួយនៅតំបន់អាម៉ាហ្សូនប្រេស៊ីល ។
ក្នុងសន្និសីទសារព័ត៌មានមួយ លោក វីនីគ្លូសអាល់ម៉ីដា លេខាធិការផ្នែកសន្តិសុខរដ្ឋអាម៉ាហ្សូនណាស់និយាយថា យន្តហោះកង្ហាម៉ាស៊ីន២ ធុន EMB -110 ផលិតដោយក្រុមហ៊ុនយន្តហោះប្រេស៊ីល EMBRAER មិនអាចចុះបានដោយសារភ្លៀងធ្លាក់ខ្លាំងពេកនៅបាសឺឡូស ។ យន្តហោះបានរត់ធ្លាក់ផ្លូវបន្ទាប់ពីចុះឆ្ងាយពេក បណ្ដាលឱ្យស្លាប់អ្នកដំណើរ ១២នាក់ និងសមាជិកក្រុមយានិក ០២នាក់ ។ ពុំមានអ្នកណាម្នាក់នៅរស់រានមានជីវិតឡើយ ក្រោយយន្តហោះរត់ធ្លាក់ផ្លូវ ។
តាមលទ្ធផលដំបូងៗនៃការស៊ើបអង្កេតថា អ្នកដំណើរទាំងអស់ជាបុរសប្រេស៊ីល ដែលទៅកាន់តំបន់នោះដើម្បីធ្វើការនេសាទបែបកីឡា។ ក្រោយយន្តហោះជូបគ្រោះថ្នាក់ធ្លាក់ពីផ្លូវ លោក វីនសុនលីម៉ា អភិបាលរដ្ឋអាម៉ាហ្សូណាស់សរសេរតាមបណ្ដាញសង្គមថា ខ្ញុំសូមសម្ដែងសាមគ្គីភាព និងចូលរួមរំលែកទុក្ខជាមួយគ្រួសារជនរងគ្រោះ។
រូបភាពនានាចេញផ្សាយបណ្ដាសារព័ត៌មានប្រេស៊ីល បង្ហាញយន្តហោះធុនតូចពណ៌សនោះ ពោះវាអូសលើផ្លូវដីមួយដោយផ្នែកខាងមុខរបស់វាធ្លាក់ចូលក្នុងព្រៃលិចទឹកមួយ ។ យន្តហោះនោះហោះចេញពីទីក្រុងម៉ាណាអូសរដ្ឋធានីនៃរដ្ឋខាងលើមកកាន់ក្រុងបាសឺឡូស ពោលត្រូវហោះហើររយៈពេលប្រមាណ ៩០នាទី ។ តាមអាជ្ញាធរថា យន្តហោះ ០២គ្រឿងទៀត ដែលមកដល់ក្បែរក្រុងបាសឺឡូសដែរស្ទើរដំណាលគ្នា ត្រូវហោះបកទៅកាន់ក្រុងម៉ាណាអូសវិញមកពីធាតុអាកាសមិនល្អ ៕
