(កណ្តាល) ៖ កសិដ្ឋានវារីវប្បកម្ម Cambodia Fresh Farm មានទីតាំងស្ថិតនៅក្នុងស្រុកពញាឭ ខេត្តកណ្ដាល។ ទីនេះជាទីកន្លែងចិញ្ចឹមត្រី «ទីឡាព្យា» សម្រាប់យកសាច់ ដែលបរិមាណនៃការលក់ក្នុង ១ខែៗក្នុងទំហំពី៤០០-៥០០គីឡូក្រាម សម្រាប់ផ្គត់ផ្គង់ចូលទីផ្សារទំនើប ភោជនីយដ្ឋានក្នុងស្រុក និងសម្រាប់នាំចេញទៅកាន់ទីផ្សារអន្តរជាតិ។ សហគ្រាសនេះបានទិញពូជកូនត្រីពី Smiling Gecko និងទិញចំណីពីអ្នកចែកចាយក្នុងស្រុក។
លោក ចាវ សួស្ដី ជាម្ចាស់កសិដ្ឋានវារីវប្បកម្ម ដែលជាកសិដ្ឋានចិញ្ចឹមត្រីទីឡាព្យា បានអនុវត្តតាមគោលការណ៍វារីវប្បកម្មល្អ និងចិញ្ចឹមត្រីលើផ្ទៃដីចំនួន ៤.៥ហិកតា និងមានស្រះចំនួន២១។ បច្ចុប្បន្ន ផលិតផលដែលក្រុមហ៊ុនចែកចាយលើទីផ្សារគឺ កែច្នៃដោយផ្ទាល់ចេញពីកសិដ្ឋាន ដែលធានាបាននូវគុណភាព និងសុវត្ថិភាព ជូនអតិថិជនគោលដៅទីផ្សារក្នុងស្រុក និងសម្រាប់នាំចេញទៅប្រទេសជប៉ុន។
លោក ចាវ សួស្ដី បានឱ្យដឹងថា ការកែច្នៃសាច់ត្រីទីឡាព្យា នៅកសិដ្ឋាននេះ ត្រូវបានប្រើប្រាស់បច្ចេកវិទ្យារបស់ប្រទេសជប៉ុន ដោយទទួលបានជំនួយបច្ចេកទេសពីទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA)។ សហគ្រាសនេះបច្ចុប្បន្នមានបុគ្គលិកសរុបចំនួន ១៤រូប (ស្រី៤ រូប)។ កសិដ្ឋានវារីវប្បកម្មក៏មានផែនការសហការជាមួយវាវីវប្បករផ្សេងៗទៀតក្នុងតំបន់ដើម្បីពង្រីកការនាំចេញ ដោយយកកសិដ្ឋានរបស់ខ្លួនជាស្តង់ដារតម្រូវ។
កសិដ្ឋានវារីវប្បកម្មខ្នាតមធ្យមនេះ មានផលិតផលសំខាន់ៗចំនួ៤គឺ សាច់ត្រីទីឡាព្យាស្រស់បង្កកដែលអាចទទួលទានបានភ្លាមៗ និងងាយស្រួលចម្អិន, សាច់ហ្វីឡេត្រីទីឡាព្យា ហាលស្ងួត អាចបរិភោគបានភ្លាមដោយគ្រាន់តែកំដៅ (សាច់ត្រីទីឡាព្យាស្ទើរឆ្អិន), ត្រីបំពងណាន់ហ្គុឃីដៃ (សាច់ត្រីទីឡាព្យាអត់ស្បែក អត់ឆ្អឹង បំពងស្រួយជាមួយម្សៅនំប៉័ង)។ ក្រៅពីនេះក៏អាចប្រើប្រាស់សម្រាប់ជាអាហារសម្រន់ ដែលមានដាក់ស្នូលសនវិច និងបឺហ្គ័រសាច់ ជាដើម, ត្រីឆ្អើរ ដែលអាចបរិភោគបានភ្លាម (ត្រីឆ្អើរទីឡាព្យាមានរសជាតិកាន់តែឆ្ងាញ់ដោយបន្ថែមម្រេច គ្រប់មុខ គ្រប់រសជាតិ)។ ផលិតផលទាំងនេះមានតម្លៃជាមធ្យមចន្លោះពី ២ដុល្លារ ដល់ ៦,៥០ដុល្លារ ក្នុងមួយកញ្ចប់ ដែលមានទម្ងន់ចន្លោះពី ១០០ក្រាម ទៅ ៣៥០ក្រាម ដែលធានាបានគុណភាព និងសុវត្ថិភាព ដែលមានការគាំទ្រពីគម្រោង CAPFISH អង្គការ UNIDO និងរដ្ឋបាលជលផលស្របតាមសុវត្តិភាពចំណីអាហារ។
ទន្ទឹមនឹងទីផ្សារក្នុងស្រុក និងប្រទេសជប៉ុន លោក ចាវ សួស្ដី ដែលជាម្ចាស់កសិដ្ឋាន ក៏បានដាក់គោលដៅថា នៅឆ្នាំ២០២៤ នឹងនាំចេញសាច់ត្រីទីឡាព្យាទៅកាន់ទីផ្សារអ៊ឺរ៉ុបផងដែរ ដោយសារលោកបានដើរតាមការណែនាំរបស់អង្គការ UNIDO ខណៈបច្ចុប្បន្នមាននៅតាមផ្សារទំនើបចំនួន ១០កន្លែង និងភោជនីយដ្ឋានចំនួន ១០កន្លែង ផ្សេងទៀត នៅក្នុងស្រុក ហើយក៏កំពុងមានការកើនឡើងក្នុងការបញ្ជាទិញផលិតផលមានស្តង់ដា និងសុវត្ថិភាពនេះ។
ម្ចាស់កសិដ្ឋានមួយនេះ បានឱ្យដឹងដែរថា ក្នុងចំណោមសហគ្រាសទាំង ២៨ ដែលគាំទ្រដោយកម្មវិធីគាំទ្រសហគ្រាសជលផលខ្នាតតូច និងមធ្យម (VCIS) មានតែសហគ្រាស Cambodia Fresh Farm ប៉ុណ្ណោះ ដែលមិនបានរៀបចំគម្រោងសំណេរអាជីវកម្ម និងសុំការគាំទ្រតែផ្នែកបច្ចេកទេស។ ប៉ុន្តែបច្ចុប្បន្នកំពុងរៀបចំពាក្យស្នើសុំសម្ភារ បរិក្ខាបន្ថែមសម្រាប់បំពេញតាមលក្ខខ័ណ្ឌតម្រូវស្តង់ដាររបស់ប្រទេសជប៉ុន។
តាមរយៈកិច្ចគាំទ្រពីគម្រោង CAPFISH សហគ្រាស Cambodia Fresh Farm រំពឹងថានឹងទទួលបានវិញ្ញាបនប័ត្រ HACCP និងពង្រីកចំណែកទីផ្សារក្នុងស្រុក អាចនាំចេញផលិតផលទៅកាន់ទីផ្សារប្រទេសជប៉ុន និងសហភាពអឺរ៉ុប ក៏ដូចជាទីផ្សារក្រៅស្រុកផ្សេងទៀតផងដែរ។ គម្រូល្អរបស់ Cambodia Fresh Farm ក៏បានលើកទឹកចិត្ត នឹងផ្ដល់អត្ថប្រយោជន៍ឱ្យកសិដ្ឋានវារីវប្បកម្មជិតខាងទទួលយក និងជំរុញការអនុវត្តអនាម័យបានល្អ។
សូមបញ្ជាក់ថា កសិដ្ឋានវារីវប្បកម្ម Cambodia Fresh Farm ត្រូវបានបង្កើតឡើងនៅឆ្នាំ២០១៧ ដោយក្រុមហ៊ុនក្នុងស្រុក Rainbow Progress Enterprises Co., Ltd៕