(បន្ទាយមានជ័យ) ៖ យុវជនម្នាក់ត្រូវចាប់ខ្លួន ក្រោយពីរំលោភសេពសន្ថវៈជនរងគ្រោះអាយុ ១៩ឆ្នាំ នៅក្នុងបន្ទប់ជួល ហើយរត់គេចខ្លួនជិត ១ខែ ទើបចាប់បាន និងត្រូវបានបញ្ជូនទៅកាន់សាលាដំបូងខេត្តបន្ទាយមានជ័យ កាលពីថ្ងៃទី១៧ ខែកញ្ញា ឆ្នាំ២០២៣ ។
លោកវរសេនីយ៍ត្រី យ៉ាន់ សុវណ្ណ មេបញ្ជាការកងរាជអាវុធហត្ថក្រុងសិរីសោភ័ណ បានប្រាប់ឱ្យដឹងថា ជនសង្ស័យដែលឃាត់ខ្លួនខាងលើនេះ មានឈ្មោះ ឡុង ហុកហេង ភេទប្រុស អាយុ ១៨ឆ្នាំ រស់នៅភូមិសូភី សង្កាត់កំពង់ស្វាយ ក្រុងសិរីសោភ័ណ ។
លោកបានបញ្ជាក់ថា មុនពេលកើតហេតុ កាលពីថ្ងៃទី២០ ខែសីហា ឆ្នាំ២០២៣កន្លងទៅ នារីរងគ្រោះ អាយុ ១៩ឆ្នាំ រស់នៅខេត្តសៀមរាប បានដាក់ពាក្យបណ្តឹងប្ដឹងឈ្មោះ ឡុង ហុកហេង ដោយចោទប្រកាន់ថា រំលោភសេពសន្ថវៈរហូតបានសម្រេចក្នុងបន្ទប់ផ្ទះជួល កាលពីថ្ងៃទី១៩ ខែសីហា ឆ្នាំ២០២៣ ស្ថិតនៅក្នុងសង្កាត់កំពង់ស្វាយ ក្រុងសិរីសោភ័ណ ហើយបានរត់គេចខ្លួនបាត់ស្រមោល ។
លោកវរសេនីយ៍ត្រី យ៉ាន់ សុវណ្ណ បានបញ្ជាក់ទៀតថា ជាការណែនាំពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ ហើយនឹងកម្លាំងកងរាជអាវុធហត្ថក្រុងសិរីសោភ័ណ បានចេញល្បាត និងចល័តត្រួតពិនិត្យអាវុធជាតិផ្ទុះ និងគ្រឿងញៀនតាមផ្លូវជាតិលេខ៦ នៅចំណុចភូមិតារ៉ាងបាល ក្នុងសង្កាត់កមពង់ស្វាយ ក្រុងសិរីសោភ័ណ បានឃាត់ខ្លួនយុវជនម្នាក់មានសាធាតុញៀន រួចនាំយកសាកសួរនៅទីបញ្ជាការកងរាជអាវុធហត្ថក្រុងសិរីសោភ័ណ និងមានបណ្តឹងជាប់ពាក់ព័ន្ធករណីរំលោភសេពសន្ថវៈលើនារីរងគ្រោះទៀត ។
ក្រោយពេលសាកសួរហើយ សមត្ថកិច្ចក៏បានកសាងសំណុំរឿង រួចបញ្ជូនទៅកាន់សាលាដំបូងខេត្តបន្ទាយមានជ័យ ដើម្បីចាត់ការតាមនីតិវិធីនៃច្បាប់ ៕