(រាជធានីភ្នំពេញ) ៖ យុវតីដៃដល់ព្រួតគ្នាប្រើហិង្សាយ៉ាងឃោរឃៅ ដោយទាត់ធាក់ និងយកស្បែកជើងវាយទៅលើនារីម្នាក់នៅមុខក្លឹបហ្គោឡាញ កាលពីវេលាទៀបភ្លឺចូលថ្ងៃទី៥ ខែកញ្ញា និងត្រូវបានមហាជនបង្ហោះចែកចាយព្រោងព្រាតនៅក្នុងបណ្តាញសង្គម ត្រូវបានកម្លាំងនគរបាលខណ្ឌសែនសុខ ស្រាវជ្រាវឃាត់ខ្លួនបាន ២នាក់ហើយ និងបានកសាងសំនុំរឿងចាត់ការតាមច្បាប់ ។
ជនដៃដល់ទាំង ២នាក់នោះ ត្រូវនគរបាលឱ្យដឹងថា ទី១-ឈ្មោះ ឃឿន ចរិយា អាយុ ១៨ឆ្នាំ ជាបុគ្គលិកហាង និងទី២-ឈ្មោះ មាន ស្រីរ័ត្ន អាយុ ១៨ឆ្នាំ ជាបុគ្គលិកហាង ស្នាក់នៅបន្ទប់ជួល ភូមិព្រៃព្រីងត្បូង សង្កាត់ចោមចៅទី៣ ខណ្ឌពោធិ៍សែនជ័យ ។ ចំណែកនារីរងគ្រោះមានឈ្មោះ សេង ស្រីនិច អាយុ ២៤ឆ្នាំ មុខរបរជាមេការហាង «ផ្កាថ្កុល» មានលំនៅបន្ទប់ជួលតាមផ្លូវជាតិលេខ៣ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
តាមនគរបាលខណ្ឌសែនបានឱ្យដឹងថា ដោយមានបទបញ្ជាពីឯកឧត្តម ឧត្តមសេនីយ៍ទោ ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ លោក វរៈសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខ បានដឹកនាំកម្លាំងផ្នែកជំនាញព្រហ្មទណ្ឌខណ្ឌសែនសុខ បានធ្វើការស្រាវជ្រាវ និងសហការជាមួយនគរបាលខណ្ឌពោធិ៍សែនជ័យ ហើយឃាត់ខ្លួនបាននារីដៃដល់ ២នាក់ កាលពីវេលាយប់ថ្ងៃទី៩ ខែកញ្ញា ឆ្នាំ២០២៣ នៅបន្ទប់ជួល ស្ថិតក្នុងភូមិព្រៃព្រីងខាងត្បូង សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
គួរបញ្ជាក់ថា កាលពីវេលាម៉ោងប្រមាណ ៣៖១០នាទីទៀបភ្លឺ ថ្ងៃទី០៥ខែ កញ្ញា ឆ្នាំ២០២៣ នៅចំណុចមុខក្លឹបកម្សាន្ត «ហ្គោលឡាញ» ស្ថិតនៅតាមបណ្តោយផ្លូវលេខ១៩៨៦ ក្នុងភូមិភ្នំពេញថ្មី សង្កាត់ភ្នំពេញថ្មី នារីមួយក្រុមមានគ្នា ៧នាក់ បាននាំគ្នាចោមរោមប្រើអំពើហិង្សាទៅលើនារីម្នាក់ ដោយប្រើដៃជើងទាត់ធាក់ ចាប់បោកសក់ វាយក្បាល និងយកស្បែកជើងវាយ បណ្តាលឱ្យជនរងគ្រោះហើមប៉ោងក្បាល មុខ និងដាច់រលាត់ដៃជើង ។ បន្ទាប់ពីប្រើហិង្សា ជនដៃដល់បានជិះម៉ូតូកង់បីគេចខ្លួនបាត់ ហើយជនរងគ្រោះក៏បានហៅម៉ូតូកង់បី ដឹកទៅព្យាបាលលាងរបួសនៅគ្លីនិកឯកជនមួយកន្លែង នៅមុខអាកាសយានដ្ឋានអន្តរជាតិភ្នំពេញ ។
នៅក្នុងសកម្មភាពព្រួតវាយគ្នាខាងលើនោះ ត្រូវបានប្រជាពលរដ្ឋថតបាន និងបង្ហោះ រួចស៊ែរតៗគ្នានៅក្នុងបណ្តាញសង្គម ។ លុះក្រោយមក ជនរងគ្រោះក៏បានទៅដាក់ពាក្យបណ្តឹង ហើយសមត្ថកិច្ចឈានទៅស្រាវជ្រាវឃាត់ខ្លួនបាន ២នាក់ នៅសល់ ៥នាក់ទៀត កំពុងតែបន្តស្រាវជ្រាវឃាត់ខ្លួនបន្តទៀតដើម្បីផ្តន្ទាទោសទៅតាមផ្លូវច្បាប់ ៕
 |
