(ខេត្តព្រះសីហនុ) ៖ ប្រជាពលរដ្ឋបានរាយការណ៍ថា មានករណីហិង្សាដោយចេតនាមួយកើតឡើងនៅវេលាម៉ោង ០២រំលងអធ្រាត្រ ថ្ងៃទី១១ ខែកញ្ញា ឆ្នាំ២០២៣ នៅចំណុច រង្វង់មូលតោ២ ស្ថិតក្នុងភូមិ៤ សង្កាត់៤ ក្រុងខេត្តព្រះសីហនុ ខេត្តព្រះសីហនុ បង្កដោយជនសង្ស័យ១ក្រុម មានគ្នា ៨នាក់ បានធ្វើសកម្មភាពយកដំបងទីបដែកវាយទៅលើជនរងគ្រោះ១ក្រុមទៀត បណ្តាលឱ្យរងរបួសដៃ ដងខ្លួន និងក្បាល ។
បន្ទាប់ពីទទួលបានព័ត៌មាននេះភ្លាម ឧត្តមសេនីយ៍ឯក ស រដ្ឋា អគ្គស្នងការរងនគរបាលជាតិ និងជាស្នងការនគរបាលខេត្តព្រះសីហនុ បានចាត់ឱ្យកម្លាំងការិយាល័យនគរបាលព្រហ្មទណ្ឌកម្រិតស្រាល ដឹកនាំបញ្ជាដោយ លោកឧត្តមសេនីយ៍ត្រី ណុប បញ្ញា ស្នងការរងទទួលផែនការងារព្រហ្មទណ្ឌ ចុះទៅដល់ទីតាំងកើតហេតុ និងបានសហការជាមួយកម្លាំងអធិការដ្ឋាននគរបាលក្រុងព្រះសីហនុ ធ្វើការឃាត់ខ្លួនបានជនសង្ស័យចំនួន ០៨នាក់ ភេទប្រុស ជនជាតិវៀតណាម នាំយកមកស្នងការដ្ឋាននគរបាលខេត្តព្រះសីហនុ ដើម្បីសួរនាំ ។
សម្ភារវត្ថុតាងចាប់យកបានរួមមាន ៖ ទូរសព្ទដៃចំនួន ១១គ្រឿង ដំបងទីបដែកចំនួន ០៣ដើម ដំបងរលាស់ ១ដើម ប៉ែលដងដែក ១ដើម ស្ព្រាយម្រេច ១កំប៉ុង និងរថយន្ត ១គ្រឿង ម៉ាក Alphard ពណ៌ស ពាក់ផ្លាកកលេខ ភ្នំពេញ 2BR-2832 ។
ករណីនេះ ការិយាល័យនគរបាលព្រហ្មទណ្ឌកម្រិតស្រាល កំពុងធ្វើការសួរនាំ ៕
