(រាជធានីភ្នំពេញ) ៖ បើតាមសេចក្តីរាយការណ៍បានឱ្យដឹងថា ជនសង្ស័យម្នាក់ ក្នុងចំណោមបក្សពួក ២នាក់ ត្រូវបានសមត្ថកិច្ចចាប់ឃាត់ខ្លួន បន្ទាប់ពីជិះម៉ូតូសណ្តោងរ៉ឺម៉កអេតចាយទៅផ្លោះរបងចូលលួចម៉ាស៊ីនបោកសម្លៀកបំពាក់នៅក្នុងផ្ទះទុកចោលមួយកន្លែង តែមិនបានសម្រេច បង្កឱ្យមានការភ្ញាក់ផ្អើលកាលពីវេលាម៉ោង ១០ និង ៤០នាទីយប់ ថ្ងៃទី២០ ខែកក្កដា ឆ្នាំ២០២៣ នៅត្រង់ចំណុចផ្ទះទុកចោល ក្បែរការិយាល័យលក់បុរីប៉េងហួត តាមបណ្ដោយផ្លូវ៥៩៨ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
តាមប្រភពព័ត៌មានពីសន្តិសុខបុរីប៉េងហួត បានរៀបរាប់ប្រាប់ឱ្យដឹងថា ផ្ទះកើតហេតុនោះ ត្រូវបានម្ចាស់ចាក់សោទុកចោលអស់រយៈពេល ៥ ទៅ ៦ខែមកហើយ យូរៗទើបម្ចាស់ផ្ទះមកមើលម្តង ។ ហើយកន្លងមក ក៏ធ្លាប់មានចោរចូលទៅលួចរបស់របរនៅខាងក្នុងផងដែរ ដូចជា ៖ ម៉ូទ័របូមទឹក ម៉ាស៊ីនត្រជាក់ និងរបស់របរផ្សេងទៀតជាច្រើនដងរួចទៅហើយ ។
ប្រភពដដែលបន្តថា លុះដល់វេលាកើតហេតុ ខណៈពេលផ្លូវមានសភាពស្ងប់ស្ងាត់ ក៏ស្រាប់តែប្រទះឃើញជនសង្ស័យចំនួន ២នាក់ ជិះម៉ូតូហុងដាឌ្រីម ស៊េរីឆ្នាំ២០២០ ពណ៌ខ្មៅ ពាក់ផ្លាកលេខ កំពង់ស្ពឺ 1P-9341 និងមានអូសរទេះអេតចាយពីក្រោយផង បានដឹកគ្នាទៅឈប់ចតចោលនៅខាងមុខផ្ទះកើតហេតុ ។ ហើយជនសង្ស័យទាំង ២នាក់នោះ ក៏នាំគ្នាផ្លោះរបងចូលទៅខាងក្នុងផ្ទះ និងបានលើកម៉ាស៊ីនបោកសម្លៀកបំពាក់យកមកដាក់នៅមាត់ទ្វាររបងទៀត ។ ពេលនោះ សន្តិសុខក៏បានហៅគ្នីគ្នាមកធ្វើការឡោមព័ទ្ធ និងបម្រុងចូលទៅចាប់ តែគាប់ជួនជនសង្ស័យទាំង ២នាក់នោះកំពុងតែផ្លោះរបងចេញមកវិញ សន្តិសុខក៏នាំគ្នាធ្វើការឃាត់ជនសង្ស័យទាំង ២នាក់នោះតែម្តង ។
ប្រភពដដែលបន្តទៀតថា ភ្លាមៗ បន្ទាប់ពីធ្វើការឃាត់ខ្លួន ជនសង្ស័យទាំងពីរនាក់នោះបានឆ្លើយដោះសារថា «ខ្លួនមិនបានលួចអ្វីនោះទេ គ្រាន់តែផ្លោះរបងចូលទៅរើសអេតចាយនៅខាងក្នុងផ្ទះកើតហេតុតែប៉ុណ្ណោះ» ។ បន្ទាប់មក ជនសង្ស័យទាំង ២នាក់នោះ ក៏បានប្រើល្បិចសុំផ្លោះរបងចូលទៅខាងក្នុង ដើម្បីទៅយកបាវអេតចាយរបស់ខ្លួនឯង ។ លុះពេលជនសង្ស័យទាំង ២នាក់ផ្លោះរបងចូលទៅយូរពេក សន្តិសុខក៏ចូលទៅតាមក្រោយ តែរកយ៉ាងណាក៏រកមិនឃើញដែរ ។
ប្រពដដែលបន្តទៀតថា បន្ទាប់ពីជនសង្ស័យទាំង ២នាក់នោះ ធ្វើការសង្ងំលាក់ខ្លួននៅខាងក្នុងអស់រយៈពេលជាង ២ម៉ោង ណាមួយឃើញនៅខាងក្រៅមានសភាពស្ងប់ស្ងាត់ទៀត តែជនសង្ស័យមិនដឹងថា មានសន្តិសុខ និងកម្លាំងសមត្ថកិច្ចកំពុងតែពួនចាំមើលនោះទេ ។ ភ្លាមៗនោះ ជនសង្ស័យទាំង ២នាក់នោះ ក៏បានសម្រេចចិត្តផ្លោះរបងពីក្នុងផ្ទះកើតហេតុ និងរត់ទៅហៅម៉ូតូកង់បីជិះ តែគេមិនព្រមដឹក ខណៈពេលនោះ សន្តិសុខ និងកម្លាំងសមត្ថកិច្ចក៏បានចូលទៅធ្វើការចាប់ឃាត់ខ្លួនបានម្នាក់ ចំណែកឯម្នាក់ទៀតរត់គេចខ្លួនបាត់ស្រមោលតែម្តងទៅ ។
បច្ចុប្បន្ន ជនសង្ស័យ រួមទាំងវត្ថុតាង ត្រូវបានសមត្ថកិច្ចនាំយកទៅធ្វើការសាកសួរនៅអធិការដ្ឋាននគរបាលខណ្ឌសែនសុខ ដើម្បីកសាងសំណុំរឿងចាត់ការទៅតាមនីតិវិធីជាបន្តទៀត ៕
