ខេត្តសៀមរាប ៖ បើតាមសេចក្តីរាយការណ៍បានឱ្យដឹងថា កាលពីរសៀលថ្ងៃទី១៣ ខែកក្កដា ឆ្នាំ២០២៣ នគរបាលមូលដ្ឋានសង្កាត់ស្វាយដង្គុំ ក្រុងសៀមរាប ខេត្តសៀមរាប បានទទួល និងធ្វើការឃាត់ខ្លួនស្ត្រីម្នាក់ពាក់ព័ន្ធករណី «គំរាមកំហែងថា នឹងធ្វើឱ្យខូចខាត ដោយយកសាំងចំនួន ៤ដប ទៅប៉ុនប៉ងដុតភូមិគ្រឹះរបស់ប្រុសស្នេហ៍ ដើម្បីឱ្យចេញមកជួប» ។
សេចក្តីរាយការណ៍បន្តថា ស្ត្រីរូបនោះមានឈ្មោះ សីហា ទិត្យាឆរ៉ាវី ភេទស្រី អាយុ ៣៣ឆ្នាំ មុខរបរជាបុគ្គលិកក្រុមហ៊ុន មានទីលំនៅនៅភូមិខ្នារ សង្កាត់ជ្រាវ ក្រុងសៀមរាប ខេត្តសៀមរាប ។
បើតាមសាក្សីម្នាក់ដែលជាអាជីវករ បាននិយាយប្រាប់ឱ្យដឹងថា នៅវេលារសៀលថ្ងៃទី១៣ ខែកក្កដា ឆ្នាំ២០២៣ គេបានឃើញឈ្មោះ សីហា ទិត្យាឆរ៉ាវី ជិះម៉ូតូម៉ាកហុងដាឌ្រីម ១គ្រឿង ស៊េរីឆ្នាំ២០២០ ពណ៌ខ្មៅ ពាក់ផ្លាកលេខ សៀមរាប 1AI-2253 ទៅកន្លែងលក់ចាប់ហួយ រួចក៏ទិញសាំងចំនួន ៤លីត្រច្រកដាក់ថង់ ហើយយកទៅគំរាមឈ្មោះ ស៊ីន គឹមហេង ឱ្យចេញមកជួបខ្លួន បើមិនមកជួបទេ គេនឹងធ្វើការដុតភូមិគ្រឹះ «អូខេវ័នវីឡា» នោះ ចោលតែម្តង។ ប៉ុន្តែនៅពេលស្ត្រីរូបនោះ បាននិងកំពុងតែរៀបចំធ្វើសកម្មភាពប៉ុនប៉ងដុត ក៏ត្រូវបានបុគ្គលិកអូតែលទៅរារាំងទាន់ និងឃាត់ខ្លួននាំទៅកាន់សមត្ថកិច្ចនគរបាលប៉ុស្តិ៍ស្វាយដង្គុំ ក្រុងសៀមរាប ដើម្បីសាកសួរជុំវិញការគំរាមកំហែងប៉ុនប៉ងដុតភូមិគ្រឹះរបស់គេនោះ ។
នៅចំពោះមុខសមត្ថកិច្ច ស្ត្រីឈ្មោះ សីហា ទិត្យឆរ៉ាវី បានសារភាពថា «ខ្លួនពិតជាបានទិញសាំងចំនួន ៤លីត្រ ក្នុងគោលបំណងយកទៅដុតភូមិគ្រឹះ «អូខេវ័នវីឡា» នោះពិតមែន ដើម្បីគំរាមឱ្យឈ្មោះ ស៊ីន គឹមហេង ចេញមកជួបខ្លួន បើមិនចេញមកទេ ខ្លួននឹងដុតភូមិគ្រឹះនុងចោល» ។
បើតាមសាក្សីម្នាក់ទៀត ក៏បាននិយាយដែរថា កាលពីព្រឹកថ្ងៃទី១៣ ខែកក្កដា ឆ្នាំ២០២៣ ឈ្មោះ ស៊ីន គឹមហេង បានទូរសព្ទមកប្រាប់ខ្លួនថា ស្រីស្អាតយកសាំងមកដុតផ្ទះហើយ ហើយក៏បិទទូរសព្ទទៅ ។ បន្ទាប់មក ស្រាប់តែឃើញឈ្មោះ សីហា ទិត្យាឆរ៉ាវី ជិះម៉ូតូម៉ាកហុងដាឌ្រីម ពណ៌ខ្មៅ ចូលភូមិគ្រឹះ «អូខេវ័នវីឡា» ដោយមានកាន់ថង់ខ្មៅមកជាមួយផង ។ ពេលនោះទើបប្រជាការពារភូមិ និងកម្លាំងនគរបាលប៉ុស្តិ៍ស្វាយដង្គុំ ធ្វើអន្តរាគមន៍ ដោយមានឈ្មោះ ស៊ីន គឹមហេង ដែលជាប្រុសស្នេហ៍ចេញមុខដែរ និងបាននាំនាងយកទៅវាស់កម្ពស់ និងធ្វើការសម្របសម្រួលនៅប៉ុស្តិ៍សង្កាត់ស្វាយដង្គុំ ដើម្បីបញ្ចប់រឿង ។
ពាក់ព័ន្ធក្នុងករណីខាងលើនេះ សមត្ថកិច្ចបានបញ្ជាក់ថា ជាករណី «គំរាមកំហែងថានឹងធ្វើឱ្យខូចខាតពិតប្រាកដមែន មូលហេតុបណ្តាលមកពីរឿង «ស្នេហា» ដោយសារខាងប្រុសហូបចុកឆ្អែតឆ្អន់ ចង់ដោះដៃ និងចង់គេចខ្លួនឈប់ជួបខាងស្រី ទើបធ្វើឱ្យខាងស្រីមានគំនុំ ក៏បង្កជាបញ្ហាកើតឡើងបែបនេះ ហើយខាងស្រីក៏ត្រូវបាននាំទៅវាស់កម្ពស់ផងដែរ ៕