បទបញ្ជានេះក៏ត្រូវបានធ្វើឡើងតែប៉ុន្មានម៉ោង ក្រោយពីការដកលោក វេង សាខុន ពីតំណែងរដ្ឋមន្ត្រីក្រសួងកសិកម្ម ហើយលោកឧបនាយករដ្ឋមន្ត្រី អូន ព័ន្ធមុនីរ័ត្ន ត្រូវបានតែងតាំងជារដ្ឋមន្ត្រីស្ដីទីនៃក្រសួងនេះ។
ដោយដកស្រង់របាយការណ៍ពីលោក គន់ គីម ដែលជាអនុប្រធានទី១នៃគណៈកម្មការជាតិគ្រប់គ្រងគ្រោះមហន្តរាយ សម្តេចនាយករដ្ឋមន្ត្រីបានផ្សព្វផ្សាយឱ្យដឹងថា ជំនន់ទឹកភ្លៀងបានជន់លិចនៅក្នុងខេត្តចំនួន២២ ដោយប៉ះពាល់ឃុំសរុបចំនួន៧៧០។ ជំនន់នេះបានបង្ករឱ្យលិចស្រូវរបស់ប្រជាពលរដ្ឋជាង ១៥០០០ហិកតា លិចសាលារៀនដែលធ្វើសិស្សខកខានសិក្សា លិចផ្លូវថ្នល់ និងបានធ្វើមនុស្សស្លាប់៤នាក់ទៀតផង។
តាមរយៈសារសំឡេងពិសេស សម្តេចនាយករដ្ឋមន្ត្រីមានប្រសាសន៍យ៉ាងដូច្នេះ៖«ខ្ញុំសូមដាក់បទបញ្ជាទៅឯកឧត្តម អូន ព័ន្ធមុនីរ័ត្ន រដ្ឋមន្ត្ឬីស្ដីទីនៃក្រសួងកសិកម្មចាត់មន្ត្រីជំនាញរបស់ក្រសួងចុះធ្វើការជាមួយខេត្ត និងគណៈកម្មការគ្រប់គ្រងគ្រោះមហន្តរាយ ដើម្បីវាយតម្លៃឱ្យបានឆាប់បំផុតតាមតែអាចធ្វើទៅបាន អំពីការខូចខាត ដែលទាក់ទងជាមួយនឹងដំណាំស្រូវ និងដំណាំផ្សេងទៀត ដើម្បីរដ្ឋាភិបាលអាចបញ្ចេញពុជស្រូវលឿនទៅកាន់គោលដៅ ដែលមានស្រូវខូចខាតដើម្បីពលរដ្ឋបានបង្កបង្កើនផលឡើងវិញ។»។
សម្រាប់សម្តេចនាយករដ្ឋមន្ត្រី នេះគឺជាអន្តរាគមន៍ថ្នាក់ជាតិដ៏ចាំបាច់ដើម្បីធ្វើឱ្យទាន់ចុងរដូវបង្កបង្កើនផល។ ដូច្នេះ
ដូច្នេះ សម្ដេចបានអំពាវនាវឱ្យមានកិច្ចសហការរវាង ក្រសួងកសិកម្ម អាជ្ញាធរថ្នាក់ក្រោមជាតិ គណៈកម្មការជាតិគ្រប់គ្រងគ្រោះមហន្តរាយ ដើម្បីពួកគេរួមគ្នាវាយតម្លៃផង និងត្រៀមបម្រុងដើម្បីដឹកចេញពូជស្រូវ ដំណាំទៅកាន់គោលដៅផង៕
