ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើការបញ្ជាក់យ៉ាងម៉ឹងម៉ាត់ថា “ឈ្មោះហ៊ុន វិបុល ដែលបន្លំខ្លួនថា ជាប្អូនជីដូនមួយរបស់សម្តេចនោះ គឺមិនមែជាប្អូនជីដូនមួយរបស់សម្តេចទេ។ ប្អូនជីដូនមួយសម្តេច ត្រូវបានពួកប៉ុល ពត សម្លាប់តាំងពី៤៤ឆ្នាំមុនមកម្ល៉េះ”។
នៅល្ងាចថ្ងៃទី0៦ ខែកញ្ញា ឆ្នាំ២០២២នេះ លើបណ្តាញទំនាក់ទំនងសង្គម សម្តេចតេជោ ហ៊ុន សែន បានសរសេរទាក់ទងនឹងឈ្មោះ ហ៊ុន វិបុល នេះថា “ដើម្បីបញ្ចប់នៅសកម្មភាពបោកប្រាស់របស់ឈ្មោះ ហ៊ុន វិបុល ដែលបន្លំខ្លួនថា ជាប្អូនជីដូនមួយរបស់ខ្ញុំ។ ពេលនេះខ្ញុំសូមបញ្ជាក់ជូនថា ខ្ញុំពិតជាមានប្អូនជីដូនមួយម្នាក់ឈ្មោះ ហ៊ុន វិបុល ពិតមែនតែប្អូនប្រុសរបស់ខ្ញុំត្រូវបានពួក ប៉ុល ពតសម្លាប់តាំងពី៤៤ឆ្នាំមុនមកម្ល៉េះ”។
សម្តេតេជោ បានបន្ថែមថា ” ក្មួយរបស់ខ្ញុំបានណែនាំ ហ៊ុន វិបុល តាមរយៈទូរស័ព្ទពីរ លើកមកហើយតែមនុស្សនេះនៅតែបន្តតាំងខ្លួនជាប្អូនជីដូនមួយខ្ញុំ មិនព្រមឈប់ដែលរឿងនេះអាចបង្កឱ្យមានការភ័ន្តច្រឡំថា ខ្ញុំជាមនុស្សមិនរាប់អានបងប្អូន”។
សម្តេចតេជោ បានបន្តដោយធ្វើការបង្ហាញហេតុផលថា “បងប្អូនជនរួមជាតិបានដឹងហើយថា ខ្ញុំបានក្រាញននៀលរួមរស់នៅជាមួយប្រជាជនក្នុងគ្រប់កាលៈទេសៈ និងគ្រប់ស្រទាប់ក្នុងសង្គមដោយគ្មានការរើសអើង។ និយាយមួយបែបខ្ញុំគឺជាមនុស្សរាប់ញាតិ។ ហេតុអីខ្ញុំបែរជាបោះបង់ចោលប្អូនជីដូនមួយម្នាក់ដែលខ្ញុំនឹកគេទាំងយប់ទាំងថ្ងៃទៅវិញ?”។
សម្តេចតេជោ ហ៊ុន សែន បានបញ្ចប់នៅឃ្លាចុងក្រោយដោយគូសបញ្ជាក់ថា “សូមប្អូន ហ៊ុន វិបុល បញ្ឈប់សកម្មភាពបោកប្រាស់ត្រឹមនេះចុះ បើមិនចង់មានរឿង”៕
