ឆមាសទី១ ឆ្នាំ២០២២ ខេត្តសៀមរាបទទួលបានអ្នកទេសចរមកកម្សាន្តជិតមួយលាននាក់ កើនឡើង៨៥%

 ឆមាសទី១ ឆ្នាំ២០២២ ខេត្តសៀមរាបទទួលបានអ្នកទេសចរមកកម្សាន្តជិតមួយលាននាក់ កើនឡើង៨៥%

នៅក្នុងរយ:ពេល៦ខែដើមឆ្នាំ២០២២នេះ ខេត្តសៀមរាប ទទួលបានអ្នកទេសចរមកកម្សាន្តប្រមាណជិតមួយលាននាក់ ដែលចំនួននេះ មានការកើនឡើងចំនួន៨៥ភាគរយ ប្រើប្រៀបធៀបនឹងរយ:ពេលដូចគ្នាក្នុងឆ្នាំ២០២១។

យោងតាមរបាយការណ៍ប្រចាំឆមាសទី១ របស់រដ្ឋបាលខេត្តសៀមរាប ដែលត្រូវបានផ្សព្វផ្សាយនៅក្នុងកិច្ចប្រជុំសាមញ្ញលើកទី៣៨ របស់ក្រុមប្រឹក្សាខេត្តសៀមរាប អណត្តិទី៣ នាព្រឹកថ្ងៃទី១១ ខែកក្កដា ឆ្នាំ២០២២នេះ បានបង្ហាញថា ក្នុងឆមាសទី១ មានអ្នកទេសចរចំនួនប្រមាណជា ៩១០,០០០នាក់ បានមកលេងកម្សាន្តនៅខេត្តសៀមរាប ក្នុងនោះអ្នកទេសចរជាតិ មានចំនួនប្រមាណ ៨៥៥,០០០នាក់ និងអ្នកទេសចរអន្តរជាតិ ចំនួន៥៥,០៨៧នាក់។

ជាមួយគ្នានេះដែរ យោងតាមរបាយការណ៍របស់មន្ទីរទេសចរណ៍ខេត្តសៀមរាប ក៏បានឲ្យដឹងផងដែរថាក្នុងរយ:ពេល ៦ខែនេះ អ្នកទេសចរអន្តរជាតិដែលចូលមកកម្សាន្តក្នុងខេត្តនេះ ច្រើនជាងគេ គឺជនជាតិចិន ដែលមានចំនួនប្រមាណ ៩ពាន់នាក់ ខណ:អ្នកទេសចរជនជាតិបារាំងឈរនៅលំដាប់លេង២ មានចំនួនជាង ៧ពាន់នាក។ ជាមួយគ្នានេះដែរ ព្រលានយន្តហោះអន្តរជាតិសៀមរាប ក៏ទទូលបានជើងហោះហើរចំនួន ៣៨៧ជើង និងមានអ្នកដំណើរ ៣៣,៣៨៤នាក់ផងដែរ៕ អត្ថបទ និងរូបភាព: លោកជា ស្រស់ កែសម្រួលដោយ DARA